ໃນຕອນເຊົ້າວັນທີ 30 ພະຈິກ 2020 ຫໍສະໝຸດແຫ່ງຊາດ ໄດ້ຈັດງານວາງສະແດງປຶ້ມຂຶ້ນໃນໂຄງການ“ມາອ່ານກັນເທາະ” ເພື່ອເປັນການສົ່ງເສີມການອ່ານໃນລາວ. ໃຫ້ກຽດເປັນປະທານໂດຍທ່ານ ນ. ຂັນທະມາລີ ຍັງນຸວົງ ອໍານວຍການຫໍສະໝຸດແຫ່ງຊາດ ແລະ ທ່ານ ນ. ຢໍນິກ້າ ພໍເຊັນ ຫົວໜ້າຝ່າຍດຳເນີນງານມູນນິທິເອເຊຍ ພ້ອມນີ້ ກໍ່ຍັງມີຜູ້ຕາງໜ້າຈາກກົມແຜນການ ແລະ ການຮ່ວມມືສາກົນ, ທ່ານ ນ. ກົງເດືອນ ເນດຕະວົງ ທີ່ປຶກສາກິຕິມະສັກສະມາຄົມຫ້ອງສະໝຸດ, ທ່ານ ນ. ພັນນາລີ ເທບພະວົງສາ, ມູນນິທິເອເຊຍ, ສຳນັກພິມແສງສຸວັນ, ຄູອາຈານພ້ອມດ້ວຍນ້ອງນ້ອຍນັກຮຽນປະຖົມຈາກ 5 ໂຮງຮຽນ(ມີໄຊ, ສີວິໄລ, ພະຂາວ, ຈອມມະນີ ແລະ ຊ້າງຄູ້) ແລະ ພະນັກງານຫໍສະໝຸດເຂົ້າຮ່ວມຢ່າງພ້ອມພຽງ. ງານດັ່ງກ່າວໄດ້ສະຫຼຸບຄືນ ຜົນສຳເລັດຂອງການແຂ່ງຂັນແຕ້ມຮູບຂອງນ້ອງນັກຮຽນທີ່ໄດ້ເຂົ້າຮ່ວມໂຄງການໃນຄັ້ງນີ້ເຊິ່ງສາມາດຄັດເລືອກໄດ້ຜູ້ຊະນະເລີດ 5 ນ້ອງ ຈາກ 5 ໂຮງຮຽນຂ້າງເທິງນັ້ນ ພ້ອມດຽວກັນນີ້ກໍ່ໄດ້ຮັບຊົມຮັບຟັງການເສວະນາ ເພື່ອສົ່ງເສີມວຽກງານການອ່ານໃຫ້ມີການພັດທະນາຂຶ້ນຢ່າງບໍ່ຢຸດຢັ້ງ, ຮັບຊົມສິລະປະການສະແດງຈາກນັກສົ່ງເສີມການອ່ານ ຫໍສະໝຸດແຫ່ງຊາດ ແລະ ຕາງໜ້ານ້ອງນ້ອຍນັກຮຽນທີ່ເຂົ້າຮ່ວມ,ພ້ອມດ້ວຍຮັບຟັງນິທານດ້ວຍຄວາມເບີກບານມ່ວນຊື່ນ.
